Welcome to the Frontpage

ਚੰਡੀਗੜ੍ਹ, 11 ਅਗਸਤ (ਹ.ਬ.) : ਚੰਡੀਗੜ੍ਹ ਦੀ ਸੈਰ ਕਰਨ ਲਈ ਹੋਰ ਰਾਜਾਂ ਤੋਂ ਆਉਣ ਵਾਲੇ ਵੀ.ਵੀ.ਆਈ.ਪੀ. ਦੇ ਲਾਡਲਿਆਂ ਦੇ ਸਕਿਉਰਟੀ ਗਾਰਡ ਯੂਨੀਵਰਸਿਟੀ ਕੈਂਪਸ ’ਚ ਹਥਿਆਰਾਂ ਨਾਲ ਲੈਸ ਹੋ ਕੇ ਬਿਨਾਂ ਕਿਸੇ ਡਰ ਤੋਂ ਘੁੰਮਦੇ ਹਨ, ਪਰ ਯੂਨੀਵਰਸਿਟੀ ਦੇ ਸਕਿਉਰਟੀ ਗਾਰਡ ਵੀ.ਵੀ.ਆਈ.ਪੀ. ਦੇ ਇਨ੍ਹਾਂ ਲਾਡਲਿਆਂ ਦੇ ਅੱਗੇ ਬੇਵੱਸ ਹੈ। ਪੀ.ਯੂ. ਕੈਂਪਸ ਦੇ ਦਰਵਾਜ਼ਿਆਂ ’ਤੇ ਹਥਿਆਰ ਲੈ ਕੇ ਆਉਣ ’ਤੇ ਰੋਕ ਤੋਂ ਬਾਅਦ ਵੀ ਅਜਿਹੇ ਵੀ.ਵੀ.ਆਈ.ਪੀ. ਦੇ ਹਥਿਆਰਬੰਦ ਸੁਰੱਖਿਆ ਗਾਰਡ ਬਿਨਾਂ ਚੈਕਿੰਗ ਅੰਦਰ ਆਉਂਦੇ ਰਹਿੰਦੇ ਹਨ। ਇਨ੍ਹਾਂ ਵੀ.ਵੀ.ਆਈ.ਪੀ. ਦੇ ਬੱਚੇ ਯੂਨੀਵਰਸਿਟੀ ਨੂੰ ਆਪਣੀ ਨਿੱਜੀ ਜਾਇਦਾਦ ਸਮਝਦੇ ਹਨ, ਕਿ ਜਦੋਂ ਜੀਅ ਕੀਤਾ ਹਥਿਆਰ ਲੈ ਕੇ ਆਪਣੇ ਸੁਰੱਖਿਆ ਗਾਰਡਾਂ ਨਾਲ ਅੰਦਰ ਦਾਖ਼ਲ ਹੋ ਗਏ। ਬੀਤੇ ਦਿਨ ਵੀ ਇਹੀ ਘਟਨਾ ਵਾਪਰੀ। ਹਿਮਾਚਲ ਪ੍ਰਦੇਸ਼ ਦੇ ਕਿਸੇ ਵੀ.ਵੀ.ਆਈ.ਪੀ. ਦਾ ਬੇਟਾ ਯੂਨੀਵਰਸਿਟੀ ਕੈਂਪਸ ’ਚ ਘੁੰਮਣ ਆਇਆ। ਇਨ੍ਹਾਂ ਦੀ ਗੱਡੀ ਸਟੂਡੈਂਟ ਸੈਂਟਰ ਦੀ ਪਾਰਕਿੰਗ ’ਚ ਰੁਕੀ, ਪਰ ਕੁੱਝ ਵੀ.ਵੀ.ਆਈ.ਪੀ. ਦੇ ਬੇਟੇ ਨਾਲ ਹਥਿਆਰਬੰਦ ਕਮਾਂਡੋ ਸਟੂਡੈਂਟ ਸੈਂਟਰ ’ਤੇ ਘੁੰਮਦਾ ਰਿਹਾ। ਵੀ.ਵੀ.ਆਈ.ਪੀ. ਦਾ ਬੇਟਾ ਆਪਣੇ ਮਿੱਤਰਾਂ ਨਾਲ ਜਦੋਂ ਤੱਕ ਕਾਫ਼ੀ ਹਾਊਸ ’ਚ ਰਿਹਾ, ਉਦੋਂ ਤੱਕ ਕਮਾਂਡੋ ਸਟੂਡੈਂਟ ਸੈਂਟਰ ’ਚ ਟਹਿਲਦਾ ਰਿਹਾ, ਪਰ ਸੈਂਟਰ ’ਤੇ ਤੈਨਾਤ ਸਕਿਉਰਟੀ ਗਾਰਡ ਨੇ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਨਹੀਂ ਕੀਤੀ। ਇਸ ਕਮਾਂਡੋ ਦੀ ਕਮਰ ’ਤੇ ਪਿਸਤੌਲ ਟੰਗੀ ਹੋਈ ਸੀ। ਵੀ.ਵੀ.ਆਈ.ਪੀ. ਦੇ ਬੇਟੇ ਦੇ ਆਉਣ ਤੋਂ ਬਾਅਦ ਇੲ ਕਮਾਂਡੋ ਗੱਡੀ ’ਚ ਸਵਾਰ ਹੋ ਕੇ ਉਥੋਂ ਨਿਕਲ ਗਿਆ, ਪਰ ਕਿਸੇ ਨੇ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਨਹੀਂ ਕੀਤੀ। ਪੀ.ਯੂ. ਕੈਂਪਸ ’ਚ ਕਿਸੇ ਵੀ ਵੀ.ਵੀ.ਆਈ.ਪੀ. ਦੀ ਸੁਰੱਖਿਆ ’ਚ ਤੈਨਾਤ ਗਾਰਡ ਦੇ ਆਉਣ ’ਤੇ ਰੋਕ ਨਹੀਂ ਹੈ, ਪਰ ਜੇਕਰ ਕਿਸੇ ਵੀ.ਵੀ.ਆਈ.ਪੀ. ਦਾ ਪਰਵਾਰ ਕੈਂਪਸ ’ਚ ਹਥਿਆਰਬੰਦ ਗਾਰਡ ਨੂੰ ਲੈ ਕੇ ਆਉਂਦਾ ਹੈ ਤਾਂ ਇਸ ਗੇਟ ’ਤੇ ਤੈਨਾਤ ਗਾਰਡ ਨੂੰ ਇਸ ਦੀ ਸੂਚਨਾ ਦੇਣੀ ਪਵੇਗੀ। ਪੀ.ਯੂ. ਦੇ ਦਰਵਾਜ਼ਿਆਂ ’ਤੇ ਤੈਨਾਤ ਗਾਰਡ ਨੂੰ ਹੁਕਮ ਜਾਰੀ ਕੀਤੇ ਗਏ ਹਨ ਕਿ ਕੈਂਪਸ ’ਚ ਆਉਣ ਵਾਲੀ ਹਰੇਕ ਗੱਡੀ ਨੂੰ ਚੈ¤ਕ ਕੀਤਾ ਜਾਵੇ। ਇਹ ਚੈਕਿੰਗ ਇਸ ਕਰਕੇ ਹੈ ਕਿ ਕੋਈ ਵਿਅਕਤੀ ਪੀ.ਯੂ. ’ਚ ਹਥਿਆਰ ਲੈ ਕੇ ਨਾ ਆ ਜਾਵੇ। ਪੀ.ਯੂ. ਦੇ ਡੀ.ਐਸ.ਡਬਲਿਊ. ਪ੍ਰੋ. ਨਵਲ ਕਿਸ਼ੋਰ ਦਾ ਕਹਿਣਾ ਹੈ ਕਿ ਕਿਸੇ ਵੀ ਵੀ.ਵੀ.ਆਈ.ਪੀ. ਦੇ ਪਰਵਾਰ ਵਾਲੇ ਹਥਿਆਰਬੰਦ ਗਾਰਡ ਨੂੰ ਲੈ ਕੇ ਪੀ.ਯੂ. ਕੈਂਪਸ ’ਚ ਨਹੀਂ ਆ ਸਕਦਾ। ਜੇਕਰ ਅਜਿਹਾ ਹੋਇਆ ਤਾਂ ਇਹ ਲਾਪਰਵਾਹੀ ਹੈ ਅਤੇ ਜ਼ਿੰਮੇਵਾਰ ਸੁਰੱਖਿਆ ਕਰਮਚਾਰੀਆਂ ਕੋਲੋਂ ਜਵਾਬ ਮੰਗ ਕੇ ਕਾਰਵਾਈ ਕੀਤੀ ਜਾਵੇਗੀ।